कांद्याला भाव वाढताच चोरट्यांचा डल्ला; जुन्नरमध्ये ५१ गोणी चोरीला

नारायणगाव : औरंगपूर (ता. जुन्नर) येथील कांदा चाळीतून ५० किलो वजनाच्या ५१ गोणी कांदा अज्ञात चोरट्यांनी चोरून नेल्याची घटना घडली. या प्रकरणी कांदा उत्पादक शेतकरी प्रभाकर संभाजी भापकर यांनी नारायणगाव पोलीस ठाण्यात तक्रार दिली आहे. अज्ञात चोरट्यांविरोधात गुन्हा दाखल करण्यात आला असून तपास सुरू आहे. भापकर यांनी कांदा चाळीत साठवून ठेवलेला कांदा गोण्यांसह चोरीला गेला. चोरी झालेल्या गोण्यांचे एकूण वजन सुमारे २ हजार ५५० किलो आहे. या घटनेत शेतकऱ्याचे अंदाजे १ लाख १० हजार रुपयांचे नुकसान झाल्याची माहिती आहे. कांद्याला चांगला भाव मिळेल या अपेक्षेने शेतकरी माल साठवून ठेवतात. अशा साठवलेल्या कांद्याची चोरी झाल्याने उत्पादकांमध्ये चिंता व्यक्त होत आहे. चोरीची माहिती मिळाल्यानंतर भापकर यांनी पोलिसांकडे तक्रार नोंदवली. नारायणगाव पोलीस ठाण्याचे सहाय्यक पोलीस निरीक्षक प्रवीण सपांगे यांनी या घटनेची माहिती दिली. पोलिसांनी अज्ञात चोरट्यांविरोधात गुन्हा दाखल केला असून चोरीला गेलेल्या कांद्याचा आणि आरोपींचा शोध सुरू आहे.