डिस्चार्जनंतर शरद पवार पुन्हा रुग्णालयात दाखल; प्रकृती स्थिर, तपासण्या सुरू
पुण्यातील रुग्णालयातून डिस्चार्ज मिळाल्यानंतर शरद पवार यांना मुंबईतील ब्रीच कँडी रुग्णालयात दाखल करण्यात आले. रोहित पवारांच्या माहितीनुसार, प्रकृती स्थिर असून पुढील तपासण्या केल्या जात आहेत.
पुण्यातील रुग्णालयातून डिस्चार्ज मिळाल्यानंतर ज्येष्ठ नेते शरद पवार यांना मुंबईतील ब्रीच कँडी रुग्णालयात दाखल करण्यात आले आहे. प्रकृतीची तपासणी करण्यासाठी त्यांना रुग्णालयात आणल्याची माहिती राष्ट्रवादी काँग्रेसचे नेते रोहित पवार यांनी दिली.
शरद पवार यांना यापूर्वी खोकला आणि छातीत दुखत असल्याच्या तक्रारीनंतर पुण्यातील रुबी हॉल क्लिनिकमध्ये दाखल करण्यात आले होते. उपचारानंतर त्यांना डिस्चार्ज देण्यात आला. त्यानंतर ते मुंबईला आले असता पुढील तपासण्यांसाठी ब्रीच कँडी रुग्णालयात दाखल झाले.
रोहित पवारांच्या माहितीनुसार, शरद पवारांची प्रकृती सध्या स्थिर आहे. बाहेरचे दौरे आणि प्रवासामुळे व्हायरल इन्फेक्शनची शक्यता तपासण्यासाठी काही वैद्यकीय चाचण्या केल्या जात आहेत. रुग्णालयात दाखल केल्याने कार्यकर्त्यांमध्ये चिंता निर्माण झाली असली, तरी ही खबरदारीचा भाग म्हणून सुरू असलेली तपासणी असल्याचे सांगण्यात आले.
