महागाईचा फटका! सणासुदीपूर्वी साखरेचे दर पन्नाशीपार; सर्वसामान्यांच्या खिशावर वाढला ताण
सणासुदीच्या तोंडावर साखरेच्या दरात किलोमागे ६ ते ७ रुपयांची वाढ झाली असून किरकोळ बाजारात भाव ५२ ते ५३ रुपयांवर पोहोचले आहेत. वाढती मागणी आणि पुरवठ्यातील तुटवडा यामुळे महागाईचा फटका सर्वसामान्यांना बसत असून सरकारने साखरेचा पुरवठा सुरळीत ठेवण्यासाठी साठा मर्यादाही लागू केली आहे.
सणासुदीचा हंगाम अवघ्या काही दिवसांवर येऊन ठेपला असतानाच सर्वसामान्य नागरिकांना महागाईचा आणखी एक मोठा धक्का बसला आहे. गेल्या महिनाभरात साखरेच्या किरकोळ दरात किलोमागे सुमारे ६ ते ७ रुपयांची वाढ झाली असून अनेक ठिकाणी साखरेचा भाव ५२ ते ५३ रुपये प्रतिकिलोपर्यंत पोहोचला आहे. त्यामुळे घरगुती बजेटसह मिठाई व्यवसाय, बेकरी उद्योग आणि खाद्यपदार्थ निर्मात्यांच्या खर्चातही वाढ होण्याची शक्यता आहे.
व्यापाऱ्यांच्या मते, उत्पादनातील घट, साखरेचा मर्यादित पुरवठा आणि रक्षाबंधन, जन्माष्टमी, गणेशोत्सव तसेच आगामी सणांमुळे वाढलेली मागणी यामुळे बाजारात दर झपाट्याने वाढले आहेत. पुरवठ्याच्या तुलनेत मागणी जास्त असल्याने दर आणखी वाढण्याची शक्यता व्यक्त केली जात आहे.
वाढत्या किमतींचा परिणाम घरगुती वापराबरोबरच मिठाई दुकाने, बेकरी, हॉटेल आणि खाद्य उद्योगावरही होणार आहे. गोड पदार्थांच्या उत्पादन खर्चात वाढ झाल्यास त्याचे पडसाद किरकोळ विक्रीवरही उमटण्याची शक्यता आहे.
दरम्यान, सणासुदीच्या काळात कृत्रिम टंचाई आणि साठेबाजी रोखण्यासाठी केंद्र सरकारने १ ऑगस्ट ते ३० नोव्हेंबर २०२६ या कालावधीत साखर व्यापाऱ्यांवर साठा मर्यादा लागू करण्याचा निर्णय घेतला आहे. या निर्णयामुळे बाजारातील पुरवठा सुरळीत राहावा आणि ग्राहकांवरील महागाईचा ताण कमी व्हावा, असा सरकारचा उद्देश आहे.
