राष्ट्रपती द्रौपदी मुर्मू यांच्या दौऱ्याने नाशिक कुंभनगरीत व्हीव्हीआयपी छावणीचे वातावरण
राष्ट्रपती द्रौपदी मुर्मू आणि इतर नेत्यांच्या उपस्थितीत नाशिकमध्ये धर्मध्वजारोहण सोहळा पार पडला. या दौऱ्यामुळे शहराला काही दिवस व्हीव्हीआयपी छावणीचे स्वरूप आले होते.
राष्ट्रपती द्रौपदी मुर्मू, मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि सुनेत्रा पवार यांच्या उपस्थितीत ३१ ऑक्टोबर रोजी नाशिकमध्ये धर्मध्वजारोहण सोहळा दिमाखात पार पडला. या मोठ्या सोहळ्यामुळे आणि व्हीव्हीआयपी ताफ्यांच्या रेलचेलीमुळे गेल्या चार-पाच दिवसांपासून नाशिक शहरात हायप्रोफाइल वातावरण पाहायला मिळाले. चौकाचौकांत खाकी वर्दीचा पहारा आणि सायरनच्या गजराने संपूर्ण शहराचे वेधले.
राष्ट्रपतींच्या या खास दौऱ्यामुळे शहरात सुरक्षेचे अत्यंत कडक नियोजन करण्यात आले होते. प्रमुख मार्गांवर सुरक्षा वाहनांची मोठी वर्दळ सुरू होती आणि प्रत्येक हालचालीवर पोलिसांची करडी नजर होती. सीसीटीव्ही तसेच ड्रोनच्या माध्यमातून संपूर्ण परिसरावर नजर ठेवण्यात आली. व्हीव्हीआयपींचे ताफे मार्गस्थ होत असताना वाहतुकीचे नियोजन वारंवार बदलले जात होते आणि काही काळ वाहतूक थांबवली जात होती.
पोलिस दल आणि प्रशासनाने या बंदोबस्तासाठी विशेष तयारी केली होती. प्रमुख चौकांपासून ते थेट सोहळ्याच्या जागेपर्यंत अधिकारी व कर्मचारी मोठ्या संख्येने तैनात होते. वाहनांची कसून तपासणी आणि गर्दीवर नियंत्रण ठेवण्यासाठी यंत्रणा सज्ज होती. सायरनाचा आवाज येताच नागरिकांचे कुतूहल रस्त्याकडे जात होते आणि नेहमीच्या वर्दळीला एक वेगळेच वळण मिळाले होते.
येत्या काळात सिंहस्थ कुंभमेळ्या निमित्ताने देशभरातून अनेक भाविक, पर्यटक तसेच मोठे नेते नाशिकमध्ये येणार आहेत. त्यामुळे आगामी काळात वाहतूक व्यवस्था, सुरक्षा आणि प्रशासकीय समन्वय राखणे मोठे आव्हान ठरणार आहे. गेल्या काही दिवसांमधील ही व्हीव्हीआयपी हालचाल म्हणजे आगामी कुंभमेळ्याची एक प्रकारे रंगीत तालीमच ठरली आहे.
