शेतकरी हिताला प्राधान्य; मान्सूनच्या स्थितीचा जयदादा पवारांनी घेतला वैज्ञानिक आढावा

महाराष्ट्रात मान्सूनच्या आगमनास होत असलेल्या विलंबामुळे निर्माण झालेल्या परिस्थितीचा अभ्यास करण्यासाठी युवानेते जय अजितदादा पवार यांनी मुंबई येथील Regional Meteorological Centre (RMC) ला भेट देत हवामान तज्ज्ञांशी सविस्तर चर्चा केली. राज्यातील शेतकरी, जलसाठे आणि शेती क्षेत्रावर होणाऱ्या संभाव्य परिणामांचा सखोल आढावा घेणे हा या भेटीचा मुख्य उद्देश होता.

यावेळी RMC मधील Scientist-G श्री. बिक्रम सिंग यांनी जय पवार यांचे स्वागत करून संस्थेच्या कार्यपद्धतीची माहिती दिली. त्यानंतर Scientist-E डॉ. नायर, Scientist-D सौ. निथा, Scientist-C डॉ. जिस्मी आणि Meteorologist-B श्री. योगेश यांच्यासोबत मान्सूनच्या सद्यस्थितीवर विस्तृत चर्चा झाली.

मान्सूनच्या आगमनास होत असलेल्या विलंबामागील विविध कारणांचा यावेळी तपशीलवार आढावा घेण्यात आला. विशेषतः एल निनो (El Niño) चा संभाव्य प्रभाव, वातावरणातील बदल, पर्जन्यमानाची स्थिती आणि त्याचा राज्यातील शेती व जलसाठ्यांवर होणारा परिणाम यावर तज्ज्ञांसोबत मंथन करण्यात आले.

हवामान तज्ज्ञांनी दिलेल्या माहितीनुसार, महाराष्ट्रात सुमारे २५ जूनच्या आसपास मान्सून पुन्हा सक्रिय होण्याची शक्यता आहे. त्यामुळे आगामी काही दिवसांत राज्यातील अनेक भागांमध्ये पावसाचा जोर वाढण्याची अपेक्षा व्यक्त करण्यात आली आहे.

मान्सूनच्या विलंबामुळे अनेक भागांतील शेतकरी पेरणीच्या प्रतीक्षेत आहेत. अशा परिस्थितीत अपुऱ्या पावसात पेरणी केल्यास दुबार पेरणीचे संकट निर्माण होऊन आर्थिक नुकसान होऊ शकते. त्यामुळे पुरेसा पाऊस झाल्यानंतरच पेरणीचा निर्णय घ्यावा, असे आवाहन जय पवार यांनी शेतकरी बांधवांना केले आहे.

"राज्यातील शेतकरी, शेती क्षेत्र, जलसाठे आणि सर्वसामान्य जनजीवनासाठी मान्सून अत्यंत महत्त्वाचा आहे. त्यामुळे हवामान विभागाशी सातत्याने संपर्क ठेवून मान्सूनच्या प्रगतीविषयीची अचूक आणि अद्ययावत माहिती जनतेपर्यंत पोहोचविण्याचा प्रयत्न केला जाईल," असे जय पवार यांनी यावेळी सांगितले.

राज्यातील शेतकरी आणि जलसंपदा व्यवस्थापनाशी संबंधित प्रश्नांवर अभ्यासपूर्ण भूमिका घेत जय पवार यांनी केलेली ही भेट आगामी खरीप हंगामाच्या दृष्टीने महत्त्वपूर्ण मानली जात आहे.